विपद् प्रभावित विशेष संरक्षण आवश्यक भएका बालबालिकाका लागि ठेचोमा अस्थायी संरक्षण सेवा केन्द्र सञ्चालन

राष्ट्रिय बाल अधिकार परिषद्ले विपद्का कारण विशेष संरक्षणको आवश्यकता भएका बालबालिकाका लागि ललितपुरको गोदावरी नगरपालिका–१२, ठेचोमा अस्थायी संरक्षण सेवा केन्द्र स्थापना गरी सञ्चालनमा ल्याएको छ।

परिषद्का अनुसार विशेष संरक्षणको आवश्यकता भएका तथा उद्धार एवं स्थानान्तरण गरी ल्याइएका बालबालिकालाई आवास, खानपान, स्वास्थ्य उपचार, मनोसामाजिक सहयोग, परिवार खोजी तथा परिवार पुनर्मिलनलगायतका सेवा उपलब्ध गराउने उद्देश्यले केन्द्र सञ्चालनमा ल्याइएको हो। साथै, बालबालिकाको दीर्घकालीन संरक्षणको आवश्यकता पहिचान गरी उपयुक्त व्यवस्था गर्ने उद्देश्यसमेत रहेको परिषद्ले जनाएको छ।

बालबालिका सम्बन्धी ऐन, २०७५ को दफा ४५ को उपदफा (१) को खण्ड (ट) बमोजिम विपद् वा सशस्त्र द्वन्द्वका कारण बाबुआमा दुवै वा आमाबाबुमध्ये एक गुमाएका, बेपत्ता भएका वा स्वयं शारीरिक तथा मानसिक रूपमा घाइते वा अपाङ्गता भएका बालबालिकालाई विशेष संरक्षणको आवश्यकता भएका बालबालिकाका रूपमा लिइन्छ।

भोटेकोशी तथा त्रिशूली बाढीबाट प्रभावित बालबालिकाको पहिचान गरी आवश्यक संरक्षण तथा सेवा उपलब्ध गराउन परिषद्ले ‘भोटेकोशी बाढी प्रभावित बालबालिकाको संरक्षण तथा व्यवस्थापन सहजीकरण कार्ययोजना, २०८३’ कार्यान्वयनमा ल्याएको छ। हाल रसुवा र नुवाकोटका बाढी प्रभावित स्थानीय तहमा परिषद्को नेतृत्वमा खटिएका टोलीले होल्डिङ सेन्टर तथा समुदायमा गई प्रभावित बालबालिकाको अवस्था पहिचान, विस्तृत लेखाजोखा तथा आवश्यक संरक्षण सेवाका लागि सहजीकरण गरिरहेका छन्।

त्यसैगरी, बाढी प्रभावित सङ्कटग्रस्त क्षेत्रबाट काठमाडौंका विभिन्न ठाउँमा ल्याइएका बालबालिकाको अवस्थासमेत पहिचान गर्न परिषद्को नेतृत्वमा छुट्टै सहजीकरण टोली गठन गरिएको छ। उक्त टोलीले बालबालिकाको पारिवारिक तथा मनोसामाजिक अवस्था र विशेष संरक्षणको आवश्यकता भए/नभएको सम्बन्धमा विस्तृत लेखाजोखासहित आवश्यक सहजीकरण गरिरहेको परिषद्ले जनाएको छ।

बाढीका कारण परिवार तथा संरक्षकविहीन भएका, परिवारबाट छुटिएका वा आफन्तको संरक्षणमा रहेका बालबालिकालाई कुनै समस्या वा जोखिम देखिएमा सम्बन्धित जिल्लामा परिचालित सहजीकरण टोलीसँग तत्काल सम्पर्क गर्न परिषद्ले अनुरोध गरेको छ।

बाढी प्रभावित बालबालिकाको पारिवारिक सुरक्षा र संरक्षणलाई उच्च प्राथमिकतामा राख्दै परिषद्ले सम्बन्धित स्थानीय तह, बाल कल्याण अधिकारी, स्थानीय प्रशासन, सुरक्षा निकाय तथा बाल अधिकारका क्षेत्रमा कार्यरत संघसंस्थासँग आवश्यक समन्वय, सहजीकरण र सहकार्य गरिरहेको जनाएको छ।

काठमाडौंका विभिन्न अस्पतालमा उपचाररत बाढी प्रभावित बालबालिका तथा उनीहरूका अभिभावकलाई आवास तथा खानपानको समस्या भएमा ललितपुरको गोदावरी नगरपालिका–१२, ठेचोस्थित अस्थायी संरक्षण सेवा केन्द्रमार्फत आवश्यक व्यवस्था गर्न सकिने परिषद्ले जनाएको छ।