आज देशभर मौसम बदली : पहाडी र तराई क्षेत्रमा वर्षा, हिमाली भेगमा हिमपातको सम्भावना

काठमाडौं । जल तथा मौसम विज्ञान विभागअन्तर्गतको मौसम पूर्वानुमान महाशाखाले आज देशभरको मौसममा सामान्य बदली रहने जनाएको छ। महाशाखाका अनुसार आज दिउँसो देशभर साधारणतया बादल लाग्ने र देशका विभिन्न स्थानमा मेघगर्जन तथा चट्याङसहित मध्यम वर्षा र हिमपातको सम्भावना रहेको छ।

महाशाखाले जारी गरेको मौसम बुलेटिनअनुसार, आज दिउँसो कोशी, बागमती, गण्डकी र लुम्बिनी प्रदेशका हिमाली भू–भागका थोरै स्थानहरूमा तथा कर्णाली र सुदूरपश्चिम प्रदेशका हिमाली भेगका एक–दुई स्थानमा मेघगर्जन र चट्याङसहित मध्यम वर्षा तथा हिमपात हुनेछ। यसका साथै, देशका पहाडी भू–भागका केही स्थान र तराईका थोरै स्थानमा समेत मेघगर्जनसहित मध्यम वर्षाको पूर्वानुमान गरिएको छ।

रातिको समयमा पनि देशका हिमाली र पहाडी भू–भागमा साधारणतया बदली नै रहने मौसमविद्हरूले बताएका छन्। राति लुम्बिनी र सुदूरपश्चिम प्रदेशका तराई भू–भागमा साधारणतया बादल लाग्नेछ भने बाँकी तराई क्षेत्रमा आंशिक बदली रहनेछ।

महाशाखाका अनुसार राति हिमाली क्षेत्रका एक–दुई स्थानमा मेघगर्जन र चट्याङसहित हल्का वर्षा तथा हिमपातको सम्भावना छ। त्यस्तै, पहाडी भेगका थोरै स्थानहरूमा मेघगर्जनसहित मध्यमसम्मको वर्षा हुन सक्नेछ।

यसैगरी, राति लुम्बिनी र सुदूरपश्चिम प्रदेशका तराई भू–भागका थोरै स्थानमा तथा मधेशसहित कोशी, बागमती र गण्डकी प्रदेशका तराईका एक–दुई स्थानमा मेघगर्जन र चट्याङसहित मध्यम वर्षाको सम्भावना रहेको मौसम पूर्वानुमान महाशाखाले जानकारी दिएको छ। देशभर मौसम सक्रिय रहेकाले आवश्यक सतर्कता अपनाउनसमेत आग्रह गरिएको छ।