अनाधिकृत रूपमा बिदामा बस्ने र कार्यालयमा अनुपस्थित रहने ७ इन्जिनियर सरकारी सेवाबाट बर्खास्त
२ मंसिर २०८३2 Mangsir 2083
Office of the Prime Minister and Council of Ministers
More from this departmentकाठमाडौँ । पूर्वाधार विकास मन्त्रालयले लामो समयदेखि कार्यालयमा अनुपस्थित रहने तथा पूर्वस्वीकृतिबिना बिदामा बस्ने सात जना इन्जिनियरलाई सरकारी सेवाबाट हटाएको छ ।
मन्त्रालयको २०८३ कात्तिक २० गतेको निर्णयअनुसार नेपाल इन्जिनियरिङ सेवा, सिभिल इन्जिनियरिङ समूह, बिल्डिङ एन्ड आर्किटेक्ट उपसमूहका राजपत्रांकित तृतीय श्रेणी (अधिकृत स्तर) का ती कर्मचारीहरूलाई सेवाबाट बर्खास्त गरिएको हो ।
मन्त्रालयले जारी गरेको सार्वजनिक सूचनाअनुसार सेवाबाट हटाइएकामध्ये छ जना इन्जिनियर लामो समयसम्म कार्यालयमा हाजिर नभई सम्पर्कविहीन रहेको कसुरमा कारबाहीमा परेका हुन् । यसरी कारबाहीमा पर्नेहरूमा पुजन न्यौपाने, सृष्टि भुषाल, सम्योग श्रेष्ठ, आस्था आचार्य, नरेश थापा र रमेशप्रसाद पौडेल रहेका छन् ।
यसैगरी, विभागीय स्वीकृतिबिना आफूखुसी बिदामा बसेको कसुरमा इन्जिनियर पदमेन्द्रप्रसाद श्रेष्ठलाई पनि सरकारी सेवाबाट हटाइएको मन्त्रालयले जनाएको छ ।
कार्यालयको अनुशासन उल्लङ्घन गरेको ठहर गर्दै उनीहरूमाथि निजामती सेवा ऐन, २०४९ को दफा ६१ को उपदफा (१) को खण्ड (छ) र (ज) तथा सोही ऐनको दफा ५९ को खण्ड (ख) को (१०) बमोजिम विभागीय कारबाही गरिएको सूचनामा उल्लेख छ ।
यद्यपि, बर्खास्त गरिएका सातै जनालाई भविष्यमा सरकारी सेवाका निम्ति अयोग्य नठहरिने गरी सेवाबाट हटाइएको मन्त्रालयले स्पष्ट पारेको छ । मन्त्रालयले सम्बन्धित सबैको जानकारीका लागि उक्त निर्णयसहितको आधिकारिक सूचना सार्वजनिक गरेको हो ।
Source: National Portal of Nepal
DigiNepal mirrors public notices for easier reading. DigiNepal is independent and is not affiliated with or endorsed by the publisher. Check the original source for the official record.
Comments are public and moderated. Don’t share phone numbers, emails or ID numbers.
No comments yet.
Sign in to react, comment or save this update.